‘Lansman Lasezon Kreol’ ti demare Sanmdi apremidi lo lans Beau Vallon avek en group peser artizanal ki fer zot larive dan en pirog e konmans redi zot lasenn lo lans.
Sa aktivite organize par Fondasyon Kiltirel Seselwa, an partenarya avek Komite Festival Kreol e avek sipor ‘bar’ Beach Shak, ti atir en gran nonm dimoun, Seselwa konman etranze.
Enn fwa ki peser ti’n a ot vwa kriye pour lans sa aktivite, se Madanm Jessie Freminot, enn bann dimoun koni pour promouvwar tradisyon ek kiltir Seselwa, ki ti devwal ‘lafis’ fer par artis popiler, Urny Mathiot, pour ofisyelman lans sa ‘Lasezon Kreol’.
Dimoun ti kapab degiste manze lokal tel ki pwason ek friyapen griye e labwason tel ki kalou, dan en dekor prensipalman tradisyonnel, avek bann ‘stall’ fer antyerman avek fey koko, e apre lanmizik tradisyonel Sesel tel ki kanmtole ek moutya. I annan ki ti’n osi profite pour met zot labiyman tradisyonnel, parey Tann Dada ki ti dan son kazak.
Sa apremidi ti osi vwar performans par bann meyer dan lanmizik Seselwa, e se Joe Samy avek son ‘Lasezon Kreol in refleri’ ki ti konmanse, swivi par Patrick Victor, John Wirtz, Gilles Lionnet (aka El Manager), David Andre e Bruce Freminot ki ti sant sanson son tonton François Havelock.
Ti osi annan performans par Jean-Marc Volcy, ki manm Fondasyon Kiltirel Seselwa. Apre sa levennman, i ti eksprim son lapresyasyon lo deroulman bann aktivite e partisipasyon piblik.
I dir ki atraver sa aktivite, Fondasyon Kiltirel Seselwa (FKS) ti oule pas en mesaz ki kiltir i pour tou Seselwa, e se pour sa ki zot in deside servi sa konsept peser Beau Vallon pour montre ki i apartyen a kominote «akoz peser i en parti for dan listwar Sesel, san peser Seselwa pa manze, e zot bann peser kiltirel, bann senner, alor nou’n onor bann senner», dapre Msye Volcy.
I osi dir ki FKS in oule osi onor de pilye Bovalon – zot koleg artis François Havelock e osi Madanm Jessie Freminot.
« Nou pe rekonnet valer ki bann dimoun in mete, bann peser, Madanm Freminot e François Havelock, ki zot in fer pour nou kiltir, e ou pa krwar Beau Vallon i annan en kantite peser ek bann parey Jessie ek François Havelock alors nou pe profite pour onor tou sa bann parey. Nou oule fer konpran ki kiltir pa en zafer alalezer, me en keksoz ki serye, ki fondamantal e ki dan leker Seselwa.»
Zournal Seychelles NATION ti koz avek Madanm Freminot ki dir menm si i pa sitan aktiv pour rezon lasante, in apresye sa zes pour enplik li dan en levennman sitan enportan e pour montre ki zot rekonnet ki in fer tou son lavi.
Santer vedet, John Wirtz, ti osi partaz menm lopinyon. Sa santer ki ti perform ‘Ou kapab bare’, i toudmenm dir i swete ti annan bokou plis partisipasyon.
«Mon krwar nou ti devret annan bokou plis ‘stall’ avek bokou plis keksoz tradisyonnel, me petet lannen prosen zot ava ranforsi lo la, selman i en tre bon linisyativ,» dapre Msye Wirtz.
Pour Connie Handstat, en touris Alman ki premye fwa i vizit Sesel, sa apremidi ti enn enteresan. I ti pe profite pour kapte otan portre ki i kapab pandan ki benn ‘Leve tradisyon’, dirize par Brian Matombe, ti pe fer zot performans.
«I tre byen ki zot pe reviv sa kiltir lontan, tre bon lenspirasyon e mon pe vreman apresye pour mon premye fwa dan zot pei,» i ti dir.
Seychelles NATION ti osi koz avek Solange Jacques, ki ti prezan avek son bann zanfan ki dir en tel aktivite ti neseser apre bokou letan ki’n napa en lanbyans parey lo lans Beau Vallon.
«In pran en nouvo lelan ki’n fer li annan sa lanbyans kiltirel, akoz ou a dir avan ti plis komersyal me la mon vwar tou keksoz fey koko, mon’n apresye. Me mon swete alaprosenn i vin plis nou kiltir avan ankor.»
Apremidi Beau Vallon ti kontiny avek lanbyans performans benn ‘Leve Tradisyon’, ki ti pe zwe bann morso kanmtole.
Aktivite pour sa enn Festival Kreol pou deroul pandan en mwan, e termin avek Bal Bobes le 31 Oktob.
Nou seleksyon portre i montre en pe lanbyans pandan ‘Lansman Lasezon Kreol’ Beau Vallon Sanmdi.
Source: Seychelles Nation