Everlasting Love Ministry an kolaborasyon avek Minister Gouvernman Lokal, ti organiz en latelye en demi zournen Vandredi pour donn plis bagaz en group zonm pour zot kapab ed lezot pour amelyor zot lavi familial e pour reste an bonn sante.
Sa latelye ki ti fer kot sant sosyal distrik Plaisance ti vwar partisipasyon en group zonm sorti dan tou kous popilasyon, dan bann distrik santral lo Mahé.
Zot ti ganny sans pour redekouver ki mannyer, konman en papa, en frer e menm en zanmi, zot kapab pli byen mannye zot lakour. Sa prezantasyon ti fer par Msye Robert Moumou.
Msye Karl Labiche ti baz son prezantasyon lo ki mannyer bann zonm i devret pran zot pozisyon dan tou laspe dan la sosyete, tandis ki Msye Jimmy Helene ti koz lo
la fason ki bann zonm i bezwen pran swen avek zot lasante.
Dan son lentervansyon pour lans sa latelye, sekreter prensipal pour gouvernman lokal, Kevin Perine, ti demann sa group partisipan pour servi sa bann bagaz ki zot pou gannyen e fer en diferans dan zot lakour, fanmir ek kominote, enkli partaz zot konnesans ki zot in gannyen avek zot bann lezot koleg zonm.
“Nou konnen ki lavi i anmenn avek li pa mal defi e ozordi dan Sesel, nou vwar nou avek bokou problenm sosyal ki pe ronz nou pti pei, e nou bann zonm, nou bezyen debout for akote nou bann madanm pour donn lanmen fer en diferans konstriktiv e pozitiv dan kominote,” PS Perine ti dir.
I ti azoute ki menm si souvannfwa se lenportans bann fanm ki ganny mansyonnen, zonm i devret fer sir ki zot osi zot annan en plas e rol tre enportan pour zwe, dan sa lenportans, konman en papa, en profesyonnel, en frer, en mari oubyen en zanmi. I ti remersye Everlasting Love Ministry pour donn lanmen ede dan devlopman sosyal e spirityel dan kominote.
Tyermenn Everlasting Love Ministry, Jude Fred, ti eksplike ki son minister ti’n deside fer sa seminar akoz dan zot travay dan la kominote, kot zot fer bann progranm entervansyon pour lafanmir, zot in remarke ki i annan en mankman pour donn bagaz bann zonm lo laspse lavi lafanmir, zot lasante e zot rol dan sosyete.
“Nou’n toultan donn bagaz bann madanm. Napa nanryen mal avek sa, me selman nou’n kit enpe bann zonm deryer. Bann zonm i mank bokou lenformasyon lo pwennvi spirityel lo lafanmir ek lasosyete e lo zot lasante ki osi vreman enportan,” Msye Fred ti fer remarke an notan ki par egzanp, zonm i pran lasante alalezer e sa mantalite ki zot krwar zot an bonn sante fodre ganny en pe lekleraz lo la.
Msye Fred ti fer remarke ki zot in kas zot progranm pour lafanmir an trwa pour sa lannen e apard sa latelye pour donn bagaz bann zonm, son minister in fini fer enn pou bann madanm osi byen ki enn pour bann koup ki’n marye, oubyen ki pe al marye, e bann ki selibater en an menaz, ki anvi konn lavi lafanmir e ki mannyer pour mannye zot lakour.
I ti azoute ki bann partisipan in ganny swazir atraver distrik e ki son minister pou kontinyen travay avek zot bann partener pour anmenn en diferans dan kominote e lasosyete an zeneral.
Source: Seychelles Nation
